जनकपुरधाम, २७ कात्तिक । नेकपा (माओवादी केन्द्र) ले मधेस प्रदेश सभाका आफ्ना दुई सांसदमाथि पार्टी ह्विप उल्लङ्घन गरेको आरोपमा कारबाही प्रक्रिया अघि बढाएको छ ।
तत्कालीन मुख्यमन्त्री जितेन्द्रप्रसाद सोनलको विश्वासको मतको मतदानमा पार्टीको निर्देशनविपरीत उभिएपछि उनीहरूविरुद्ध कारबाही प्रक्रिया आरम्भ गरिएको हो।
माओवादी केन्द्र संसदीय दल, मधेस प्रदेशका नेता भरत साहका अनुसार, प्रदेश सभा सदस्य रहबर अन्सारी र मालाकुमारी कर्णमाथि कारबाही प्रक्रिया सुरु गरिएको हो। पार्टीले उनीहरूलाई साधारण सदस्यताबाट समेत निष्कासन गर्ने तयारी गरेको साहले जानकारी दिएका छन ।
गत सप्ताह भएको विश्वासको मतका क्रममा माओवादी केन्द्रका यी दुई सांसदले पार्टीको ह्विपविपरीत उभिँदै तत्कालीन मुख्यमन्त्री जितेन्द्र सोनललाई समर्थन गर्न अस्वीकार गरेका थिए। पार्टीले विश्वासको मतका दिन सबै सांसदलाई गठबन्धनको पक्षमा मत दिन निर्देशन दिएको थियो। तर, अन्सारी र कर्णले खुला रुपमा पार्टी निर्णयको विरोध गर्दै सोनलविरुद्ध मतदान गरेका थिए ।
यी दुई सांसदकै निर्णयका कारण पाँचदलीय गठबन्धनको समर्थनमा बनेको लोसपा नेता जितेन्द्रप्रसाद सोनल नेतृत्वको सरकार ढलेको बताइएको छ । विश्वासको मतमा पर्याप्त मत नपाएपछि मुख्यमन्त्री सोनलले प्रदेश सभामै राजीनामा दिएका थिए ।
