जनकपुर, २७ कार्तिक । राष्ट्रिय समाचार समिति (रासस)का अध्यक्ष धर्मेन्द्र झाले लोकतन्त्रको संस्थागत विकास र सुशासन स्थापना गर्न पत्रकारिताको भूमिका अत्यन्त महत्वपूर्ण रहेको बताउनुभएको छ ।
उहाँले पत्रकारले आफ्नो कलम जनताको पक्षमा प्रयोग गर्दै सुशासन, पारदर्शिता र जवाफदेहिताको पक्षमा सशक्त रूपमा बोल्नुपर्ने आवश्यकता औंल्याउनुभयो ।
संसदीय पत्रकार मञ्च, मधेस प्रदेशद्वारा बिहीबार जनकपुरमा आयोजित सम्मान समारोहमा बोल्दै अध्यक्ष झाले देशमा हाल राजनीतिक अस्थिरता, भ्रष्टाचार, अनियमितता र अपराधजन्य गतिविधि बढ्दै गएकोमा गम्भीर चिन्ता व्यक्त गर्नुभयो ।
उहाँले यस्ता समस्याहरू अन्त्य गर्न सबै पक्षको साझा प्रयास आवश्यक रहेको बताउँदै, “देशमा शान्ति, अमनचयन र सुशासन कायम गर्न प्रत्येक नागरिकले आफ्नो जिम्मेवारी पूरा गर्नुपर्छ,” भन्नुभयो । 
वर्तमान सरकारले निर्वाचन घोषणा गरिसकेको अवस्थामा निष्पक्ष र शान्तिपूर्ण निर्वाचन वातावरण निर्माण सबैको कर्तव्य रहेको पनि उहाँले जोड दिनुभयो । उहाँका अनुसार, “लोकतन्त्र बलियो बनाउन पत्रकार, नागरिक समाज र राजनीतिक दलबीच आपसी सहयोग र पारदर्शिता अनिवार्य छ ।
कार्यक्रममा संसदीय पत्रकार मञ्च मधेस प्रदेशका अध्यक्ष निरंजन साहले रासस अध्यक्ष झालाई गमछा र टीका लगाई सम्मान गरे । सो अवसरमा मञ्चका उपाध्यक्ष प्रमोद साह, सहसचिव कुलदीप दास, कोषाध्यक्ष संजय यादव, सल्लाहकार सुरेश झा लगायतका पदाधिकारीहरूको उपस्थिती रहेको थियो ।
