काठमाडौं, ८ असोज । भदौ २३ र २४ गते चलेको जेनजी आन्दोलनले मुलुकका स्थानीय सरकारका संरचनामा व्यापक क्षति पुर्याएको छ ।
प्रारम्भिक तथ्यांकअनुसार देशभर ४० भन्दा बढी स्थानीय सरकारका प्रशासनिक भवनहरू पूर्णरूपमा क्षति भएका छन् ।
गाउँपालिका राष्ट्रिय महासंघ र नगरपालिका राष्ट्रिय महासंघले सार्वजनिक गरेको तथ्यांकअनुसार, नगरपालिका भन्दा बढी क्षति गाउँपालिकामा पुगेको छ ।
मधेश प्रदेशमा १० गाउँपालिकाको भवन आंशिक क्षति भएको छ भने बागमती प्रदेशमा ४ गाउँपालिकाको भवन पूर्णरूपमा क्षतिग्रस्त भएको छ । कोशी र सुदूरपश्चिम प्रदेशमा पाँच–पाँच वटा गाउँपालिकाको भवन पूर्णरूपमा क्षति भएको छ । कर्णाली प्रदेशमा भने कुनै क्षति नभएको जनाइएको छ । कोशी प्रदेशमै ४४ वटा वडा कार्यालय पूर्णरूपमा क्षति भएका छन् भने १२ वडा कार्यालय आंशिक रूपमा क्षतिग्रस्त भएका छन् ।
जनप्रतिनिधिका निवासमा पनि क्षति
आन्दोलनका क्रममा गाउँपालिका तथा वडा कार्यालय मात्र नभई जनप्रतिनिधिहरूका घरहरू समेत आन्दोलनकारीको निशानामा परेका छन् । मधेश प्रदेशमा ४ जनप्रतिनिधिको निवास पूर्णरूपमा क्षति भएको छ भने गाउँपालिका स्तरमा ११ जनप्रतिनिधिको निवास पूर्णरूपमा र ३ जनप्रतिनिधिको निवास आंशिक क्षति भएको छ ।
गाउँपालिका राष्ट्रिय महासंघका कार्यकारी प्रमुख राजेन्द्रप्रसाद प्याकुरेलका अनुसार, हालसम्मको तथ्यांक प्रारम्भिक मात्र हो र क्षतिको विवरण अझै बढ्न सक्ने सम्भावना छ । उनले भने, “गाउँपालिकाका भवनहरू क्षति भए पनि सेवा प्रवाह भने सुरु भइसकेको छ ।“
नगरपालिका संरचनामा क्षति
नगरपालिका महासंघका अनुसार, १९ नगरपालिकाका प्रशासनिक भवनमा आगजनी गरी क्षति पु¥याइएको छ । ७ नगरपालिकाका कार्यालयमा तोडफोड भएको छ भने २१ नगरपालिकाका भवन भने सुरक्षित रहेका छन् ।
नगरपालिका संघका पूर्वअध्यक्ष तथा धुलिखेल नगरपालिकाका प्रमुख अशोक व्याञ्जुको घर आन्दोलनका क्रममा क्षतिग्रस्त भएको थियो । धुलिखेल नगरपालिकाको कार्यालयमा समेत आगो लगाइएको थियो ।
क्षतिको संक्षिप्त विवरण
गाउँपालिका :
२२ पूर्ण क्षति
२७ आंशिक क्षति
वडा कार्यालय ः
४८ पूर्ण क्षति
३८ आंशिक क्षति
नगरपालिका ः
१९ भवनमा आगजनी
७ भवनमा तोडफोड
२१ भवन सुरक्षित
