जनकपुर, २१ असार । नेपाल पत्रकार महासंघ, मधेश प्रदेश समितिको प्रदेश कार्यालय उद्घाटन कार्यक्रम शनिवार जनकपुरमा भव्य रूपमा सम्पन्न भएको छ ।
पत्रकारिता क्षेत्रका विभिन्न सरोकारवालाहरू, विभिन्न सञ्चारमाध्यमका प्रतिनिधिहरूको उपस्थिति रहेको कार्यक्रममा प्रेस स्वतन्त्रता, पत्रकारहरूको उत्तरदायित्व र मर्यादाबारे महत्वपूर्ण छलफलहरू भएको बताए । कार्यक्रमका प्रमुख अतिथि भंगहा नगरपालिकाका नगर प्रमुख सञ्जीव साहले समसामयिक पत्रकारिताका मुद्दाहरूबारे स्पष्ट धारणा व्यक्त गरे । 
उनले भने, “गल्ती भएको छ भने लेख्नुस्, तर इगो बनाएर नलेख्नुस् । उनले स्वतन्त्रताको नाममा पत्रकारहरूबाट अपराधी जस्तो व्यवहार नगरियोस् भन्ने अपेक्षा व्यक्त गर्दै पत्रकारितामा आचारसंहिता र मूल्य–मान्यताको पालना अपरिहार्य रहेको बताए । 
कार्यक्रमको अध्यक्षता महासंघका प्रदेश अध्यक्ष श्याम बन्जाराले गरे । उनले मधेश प्रदेशमा सञ्चारकर्मीहरूको हकहितका लागि महासंघ प्रतिबद्ध रहेको बताए । 
उनले पत्रकारहरूको सुरक्षा, पेशागत सम्मान र क्षमता अभिवृद्धिमा केन्द्रित भएर कार्यक्रमहरू सञ्चालन गरिने जानकारी दिए । 
कार्यक्रममा वक्ताहरूले प्रेस स्वतन्त्रता कायम राख्न संवैधानिक तथा संस्थागत व्यवस्था अझै सुदृढ गर्नुपर्नेमा जोड दिएका थिए ।
साथै, पत्रकारहरूले पनि सामाजिक उत्तरदायित्वका साथ काम गर्नुपर्ने आवाज उठाइएको थियो । कार्यक्रममा अन्य विभिन्न पत्रकार संघ÷संगठनका प्रतिनिधि, सञ्चारकर्मी, तथा सरोकारवाला निकायहरूबाट शुभकामना मन्तव्यहरू राखिएका थिए ।
