मकवानपुर, १४ असार । मकवानपुरको राक्सिराङ गाउँपालिकामा चट्याङ लागेर एक बालिकाको ज्यान गएको छ भने चार जना घाइते भएका छन् ।
शुक्रबार साँझ ६ बजेतिर परेको चट्याङले राक्सिराङ–८ माइसिराङकी ६ वर्षीया अनिका प्रजाको घटनास्थलमै ज्यान गएको हो । आमा र छोरी खाना खान घरको पिँढीमा निस्कँदै गर्दा घटना भएको हो ।
चट्याङ लागेर अनिसाकी आमा २५ वर्षीया रबिना प्रजा पनि गम्भीर घाइते भएकी छन् । उनको देब्रे खुट्टा नचल्ने अवस्थामा रहेकाले थप उपचारका लागि हेटौँडा अस्पताल रिफर गरिएको इलाका प्रहरी कार्यालय मनहरीका प्रमुख डीएसपी विशाल सापकोटाले जानकारी दिए ।
हिजो साँझै चट्याङ लागेर राक्सिराङ–९ चोराङ्गमा पनि तीन जना घाइते भएका छन् । घाइतेहरूको परिचय खुल्न बाँकी छ । थप विवरण संकलन भैरहेको मनहरी प्रहरीले जनाएको छ ।
