जनकपुर, ५ असार । धनुषाको सबैला नगरपालिका–१० खैरयानीमा दुई वर्षअघि सुबिसु नेटवर्कको तारमा करेन्ट लागेर ३२ वर्षीय प्रेम कुमार साहको मृत्यु भएको घटनामा पीडित परिवारले न्यायको खोजी जारी राखेका छन् ।
बिहीबार जनकपुरमा पत्रकार सम्मेलनको आयोजना गर्दै मृतक प्रेम साहका परिवारजनले दुई वर्षसम्म पनि आफूहरू न्यायबाट वञ्चित भएको गुनासो गरेका छन् ।
मृतककी श्रीमती मनिता कुमारी साहले भावुक हुँदै भनिन्, “दुई वर्ष भयो मेरो श्रीमान् बितेको, तर अहिलेसम्म कसैले साथ दिएन । उजुरी गर्न जाँदा प्रहरीले दर्ता पनि गरेन ।
” उनका अनुसार घटनापछि सुबिसु नेटवर्क वा स्थानीय निकायबाट कुनै सहयोग प्राप्त भएको छैन । “दुई वर्षसम्म पनि न्याय नपाउनु हाम्रो दुर्भाग्य हो,” उनले भनिन् ।
त्यस्तै, मृतकका बुवा अन्देश्वर साहले प्रहरी प्रशासन र सरकारी वकिलहरूलाई भ्रष्टाचारको आरोप लगाउँदै भने, “सबै जना घुस खाएर चुप छन्, हामी जति करायो न्याय दिने कोही छैन ।”
प्रेमका आमा सुलेख्नी देवी पीडाले भरिएर पत्रकार सम्मेलनमै भक्कानिँदै भनिन्, “मेरो छोरो त गयो, तर न्याय कसले दिने हो? हामी गरीब, हामीलाई सुन्ने कोही छैन ।”
परिवारका अनुसार घटना हुँदा सुबिसु नेटवर्कको तार खुलेर मृत्यक प्रेमको शरिरमा खसेको थियो र सोही तारबाट करेन्ट लाग्दा साहको मृत्यु भएको थियो । तर अहिलेसम्म न त घटनाको छानबिन गरिएको छ, न त दोषीमाथि कारबाही ।
प्रहरी र सरोकारवाला निकायहरूबाट उपेक्षा भोगिरहेका साह परिवारले अब राष्ट्रिय तथा अन्तर्राष्ट्रिय मानव अधिकार निकायहरूसँग समेत सहयोग माग्ने चेतावनी दिएका छन् ।
