केपी रिपोर्टर,निभा झा
जनकपुर, २९ कातिक । मैथिलि विकास कोषद्वारा पहिलो पटक जनकपुरधामस्थित जानकी मन्दिरमा सामा चकेवा महोत्सव आयोजना गरिएको छ ।
यस महोत्सवको मुख्य आकर्षण सामा चकेवा खेल प्रतियोगिता थियो, जुन बिहिवार ४ बजेदेखि सुरु भएर साँझ सम्पन्न भएको थियो । मैथिलि भाषा र संस्कृतिको संरक्षण र प्रवर्द्धनको उद्देश्यले आयोजना गरिएको यस प्रतियोगितामा सहभागीहरूले सामा चकेवा खेलमा आफ्नो कला र सिर्जनशीलता प्रस्तुत गरे ।
यो प्रतियोगिता कोषका अध्यक्ष जीवनाथ चौधरीको अगुवाइमा सम्पन्न भएको थियो । उनले यो खेल प्रतियोगिता भाई–बहिनीको आपसी प्रेम र स्नेहलाई सम्मान गर्दै सामाजिक एकता र सांस्कृतिक उत्थानको लागि महत्वपूर्ण रहेको बताउनुभयो ।
सामा चकेवा खेल विशेषगरी मैथिली समाजमा भाई र बहिनी बीचको गहिरो सम्बन्ध र आपसी माया र सम्मानको प्रतीक मानिन्छ । 
यो पर्व विशेष रूपमा भाईबहिनीको सम्बन्धलाई प्रगाढ बनाउनको लागि आयोजना गरिन्छ, जसले पारिवारिक र सामाजिक एकता सुदृढ पार्ने काम गर्दछ ।
मैथिली विकास कोषले यस प्रतियोगिता मार्फत मैथिली समाजका सांस्कृतिक मूल्य र परम्पराहरुलाई संरक्षण गर्न योगदान पुर्याउने विश्वास व्यक्त गरेको छ ।
यस प्रकारका सांस्कृतिक कार्यक्रमहरूले जनसमुदायलाई मैथिली संस्कृतिको महत्त्व र सद्गुणको पुनः सम्झना गराउने काम गर्दछन् ।
