जनकपुर, ९ भदौ । समाजिक अभियन्ताहरुले धनुषाको बटेश्वर गाउँपालिकाको आँप बगान फडानी रोक्न माग गर्दै मधेशका मुख्यमन्त्री सतीशकुमार सिंहलाई ज्ञापनपत्र बुझाएका छन् ।
बटेश्वर गाउँपालिकाका किसानहरुले ८२ विघा जमिनमा लगाएको आँपको बोट फाँडेर सोलार प्लान्ट राख्ने कम्पनीलाई जग्गा भाडामा दिने तयारी गरेपछि पर्यावरण अभियन्ताहरुले बचाउन अभियान सुरु गरेको छ ।
अभियन्ता फुलगेन मगहीको नेतृत्वको टोलीले बटेश्वरका आँप किसानलाई लक्षित गरी कोल्ड स्टोर निर्माण गर्न, आँप किसानको बीमा गर्न र नमूना पकेट घोषणाअनुसार अनुदानको व्यवस्था गर्न माग गरेका छन् ।
बटेश्वरका आँप किसान हावाहुरी, असिना पानी, बजार नपाइने समस्या र किराको प्रकोपले चिन्तित छन् । लगानी र वर्षभरको मिहिनेतबाट फाइदा नआउँदा किसानहरुले करिब ६ हजार आँपको बोट फाँडेर सोलार प्लान्टका लागि जग्गा भाडामा दिने निर्णय गरेका छन् ।
यसले ठूलो पर्यावरणीय क्षति हुने भन्दै पर्यावरण अभियन्ताहरु चिन्ता ब्यक्त गरेका छन । माग पूरा नभए, आन्दोलनको चेतावनी पनि दिएका छन् ।
मुख्यमन्त्री सतीशकुमार सिंहले बटेश्वर क्षेत्रमा कृषि विद्युतीकरण तथा डिप बोरिङमार्फत सिँचाइ व्यवस्थापन र आँप भण्डारण गर्न कोल्ड स्टोर व्यवस्थापनका लागि आवश्यक काम गर्न सम्बन्धित मन्त्रालयलाई निर्देशन दिएको बताए ।
