जनकपुरधाम, १८ असार । सिरहामा पोखरीमा डुबेर दुई बालकको मृत्यु भएको छ ।
मृत्यु हुनेमा नरहा गाउँपालिका –३ खोरियाटोलका शुशील मण्डलको छोरा ६ वर्षीय राहुल मण्डल र उनकै भान्जा करिब ८ वर्षीय आशिष मण्डल रहेको प्रहरीले जनाएको छ ।
सिरहाका प्रहरी प्रवक्ता डिएसपी मुक्तिनाथ सापकोटाका अनुसार हिजो सोमबार दिउँसो करिब १ बजेदेखि खेल्ने क्रममा दुवै बालक हराएका थिए भने साँझ ५ बजे तिर प्रहरीलाई खबर आएपछि खोजबिन गर्दा आज मंगलबार बिहान साढे ८ बजेतिर स्थानीय वसन्त यादवको पोखरीमा मृत फेला परेको डिएसपी सापकोटाले बताएका छन ।
प्रहरीले शव पोष्टमार्टमको लागि प्रादेशिक अस्पताल सिरहामा राखेको र घटना विषयमा थप अनुसन्धान भइरहेको जिल्ला प्रहरी कार्यालय सिरहाले जानकारी दिएको छ ।
