काठमाडौं, २६ जेष्ठ । अपोलो ८ अन्तरिक्ष यात्री बिल एन्डर्सको निधन भएको छ ।
अधिकारीहरूका अनुसार एन्डर्स सवार विमान उत्तरी सिएटल, वासिङ्टनमा उडिरहेको बेला दुर्घटनाग्रस्त भएको छ । एन्डर्सका छोरा ग्रेगले आफ्नो बुबा सानो विमानमा सवार रहेको बीबीसीले जनाएका छन ।
उनको शव शुक्रबार फेला परेको छ । परिवारद्वारा जारी विज्ञप्तिमा भनिएको छ– हामी गहिरो पीडामा परेका छौँ । उहाँ एक महान् पाइलट हुनुहुन्थ्यो । उहाँलाई सधैँ सम्झिनेछौँ । एन्डर्स ९० वर्षका थिए ।
उनलाई बाह्य अन्तरिक्षको सबैभन्दा प्रसिद्ध फोटो खिच्ने श्रेय दिइन्छ । अमेरिकाको अपोलो मिसनमा लुनार मोड्युल पाइलट एन्डर्सले पृथ्वीको सबैभन्दा चर्चित तस्बिरमध्ये एक आफ्नो क्यामेरामा कैद गरेका थिए ।
यो बाह्य अन्तरिक्षमा खिचिएको सबैभन्दा प्रेरणादायक र यादगार तस्बिर मानिन्छ । सन् १९६८ मा क्रिसमसको एक दिनअघि सुरु गरिएको अपोलो मिसन चन्द्रमामा पुग्ने पहिलो मिसन थियो ।
एन्डर्सले पछि यो फोटोलाई अन्तरिक्ष कार्यक्रममा आफ्नो सबैभन्दा महत्त्वपूर्ण योगदानको रूपमा वर्णन गरेका थिए ।
