काठमाडौँ, ३१ असोज । प्रधानमन्त्री बालेन शाहले बडादसैँ २०८३ को अवसरमा स्वदेश तथा विदेशमा रहेका नेपालीलाई सुख, शान्ति, समृद्धि र सुस्वास्थ्यको शुभकामना दिएका छन् ।
शनिबार सामाजिक सञ्जालमार्फत शुभकामना दिँदै प्रधानमन्त्री शाहले दसैँले नेपालीबीच एकता, आत्मीयता र पारिवारिक सद्भाव बढाउने विश्वास व्यक्त गरेका छन् । उनले असत्यमाथि सत्य र खराब प्रवृत्तिमाथि असल प्रवृत्तिको विजयका लागि काम, क्रोध, लोभ, ईर्ष्या र अहंकार त्याग्नुपर्ने बताएका छन् ।
रसुवा, नुवाकोट र गोरखालगायतका स्थानमा भएका विपत्तिमा ज्यान गुमाएकाहरूप्रति श्रद्धाञ्जली अर्पण गर्दै उनले घाइतेको शीघ्र स्वास्थ्यलाभ र शोकसन्तप्त परिवारप्रति समवेदना व्यक्त गरेका छन् । विस्थापित नागरिकको पुनःस्थापनाका लागि सरकारले काम गरिरहेको पनि उनले बताएका छन् ।
प्रधानमन्त्री शाहले आर्थिक अभावका कारण दसैँ कसैका लागि बोझ बन्न नहुने उल्लेख गर्दै नागरिकको जीवनस्तर सुधार र देशमा सुशासन कायम गर्न सरकार प्रतिबद्ध रहेको बताएका छन् ।
