काठमाडौँ, ३१ असोज । राष्ट्रपति रामचन्द्र पौडेलले बडादसैँ २०८३ को अवसरमा स्वदेश तथा विदेशमा रहेका सम्पूर्ण नेपालीलाई सुख, शान्ति, समृद्धि र सुस्वास्थ्यको शुभकामना दिएका छन् ।
शुभकामना सन्देश जारी गर्दै राष्ट्रपति पौडेलले दसैँले पारिवारिक पुनर्मिलन, सामाजिक सद्भाव, भाइचारा र राष्ट्रिय एकतालाई बलियो बनाउने बताएका छन् ।
विविध जातजाति, धर्म, भाषा र संस्कृतिबीच एकता कायम राख्न पनि यस पर्वले महत्वपूर्ण भूमिका खेलेको उनको भनाइ छ ।
उनले दसैँलाई अन्यायमाथि न्याय र असत्यमाथि सत्यको विजयको प्रतीकका रूपमा उल्लेख गरेका छन् ।
यसैबीच, विभिन्न स्थानमा आएको विनाशकारी बाढीबाट भएको जनधनको क्षतिप्रति दुःख व्यक्त गर्दै राष्ट्रपति पौडेलले मृतकप्रति श्रद्धाञ्जली, शोकसन्तप्त परिवारप्रति समवेदना र घाइतेको शीघ्र स्वास्थ्यलाभको कामना गरेका छन् ।
उनले बाढी प्रभावितको पुनःस्थापनाका लागि सबै पक्षलाई एकताबद्ध भएर अघि बढ्नसमेत अपिल गरेका छन् ।
