काठमाडौं, २४ असोज । मध्य अमेरिकी देश पानामामा ७.७ म्याग्निच्युडको शक्तिशाली भूकम्प गएको छ।
शुक्रबार गएको भूकम्पले राजधानी पानामा सिटीसहित विभिन्न क्षेत्रमा क्षति पुर्याएको छ। भवन, सडक र पुलमा क्षति पुगे पनि प्रारम्भिक विवरणअनुसार मानवीय क्षतिको पुष्टि भएको छैन।
अमेरिकी भूगर्भ सर्वेक्षण (यूएसजीएस) का अनुसार स्थानीय समयअनुसार दिउँसो १ः५६ बजे गएको भूकम्पको केन्द्रबिन्दु अजुएरो प्रायद्वीपको पितालोसा अरिबा क्षेत्रनजिक थियो। भूकम्पपछि ६.९ म्याग्निच्युडको शक्तिशाली परकम्पसमेत गएको थियो।
भूकम्पबाट कोक्ले, लस सान्तोस र पानामा प्रान्त बढी प्रभावित भएका छन्।
केही होटल र सरकारी भवनका भाग भत्किएका छन् भने घर, चर्च, पानी प्रशोधन केन्द्र तथा सडकमा क्षति पुगेको छ। केही स्थानमा विद्युत् आपूर्ति अवरुद्ध भएको छ भने घाइतेहरूलाई उपचारका लागि स्वास्थ्य केन्द्रमा लगिएको छ।
राजधानी पानामा सिटीमा पनि भूकम्पको धक्का महसुस भएपछि मानिसहरू घर तथा कार्यालयबाट बाहिर निस्किएका थिए। त्यहाँका अग्ला भवन हल्लिए पनि मुख्य सहरी क्षेत्रमा ठूलो क्षति नभएको अधिकारीहरूले बताएका छन्।
भूकम्पपछि टोचुमेन अन्तर्राष्ट्रिय विमानस्थलमा उडान सेवा करिब दुई घण्टा रोकिएको थियो। सुरक्षा निरीक्षणपछि सेवा पुनः सञ्चालन गरिएको छ। पानामा नहर भने नियमित रूपमा सञ्चालन भइरहेको अधिकारीहरूले जनाएका छन्।
भूकम्पविद्हरूले थप परकम्प आउन सक्ने भएकाले सतर्कता अपनाउनुपर्ने बताएका छन्। प्रारम्भिक विश्लेषणअनुसार भूकम्प उथलो गहिराइमा उत्पन्न भएको थियो। क्षतिको विस्तृत विवरण संकलन भइरहेको छ।
