काठमाडौं, २४ असोज । नेपालबाट मनसुन पूर्ण रूपमा बाहिरिन अझै दुईदेखि तीन दिन लाग्ने मौसमविद्हरूले बताएका छन्।
मौसम पूर्वानुमान महाशाखाका अनुसार सुदूरपश्चिम र कर्णाली प्रदेशबाट मनसुन बाहिरिसकेको छ भने लुम्बिनी र गण्डकीका केही भागबाट पनि यसको प्रभाव हटेको छ।
मौसमविद् निष्ठा निरौलाका अनुसार बाँकी क्षेत्रबाट मनसुन बाहिरिने क्रममा पश्चिमी वायुको प्रभाव बढ्दै गएको छ। नेपालमा मनसुन बाहिरिने औसत मिति अक्टोबर २ भए पनि यस वर्ष केही दिन ढिलाइ भएको हो।
महाशाखाका अनुसार शनिबार दिउँसो हिमाली तथा पहाडी क्षेत्रमा सामान्यतया बादल लाग्नेछ। कोसी, बागमती, गण्डकी र लुम्बिनीका केही पहाडी तथा हिमाली क्षेत्रमा तथा कर्णाली र सुदूरपश्चिमका एक–दुई स्थानमा मेघगर्जन र चट्याङसहित वर्षा हुन सक्नेछ। तराईका केही स्थानमा पनि वर्षाको सम्भावना छ।
राति हिमाली तथा पहाडी क्षेत्रमा आंशिक बादल लाग्ने र तराईमा मौसम मुख्यतः सफा रहने अनुमान छ। तराईका केही स्थानमा बिहानपख हुस्सु लाग्न सक्नेछ।
काठमाडौं उपत्यकामा पनि साँझपख सामान्य वर्षा हुन सक्ने मौसमविद्ले बताएका छन्। मनसुन पूर्ण रूपमा बाहिरिएपछि नेपालमा अक्टोबर र नोभेम्बर महिनालाई उत्तरमनसुन अवधि मानिन्छ।
त्यसपछि डिसेम्बरदेखि हिउँद र मार्चदेखि पूर्वमनसुन सुरु हुने गर्छ।
