काठमाडौं, २१ असोज । नेपाल र रुसबीचको द्विपक्षीय परामर्श संयन्त्रको तेस्रो बैठक आज काठमाडौंमा हुँदैछ। बैठकमा नेपाली प्रतिनिधि मण्डलको नेतृत्व परराष्ट्र सचिव अमृतबहादुर राई र रुसी पक्षको नेतृत्व नेपाल भ्रमणमा रहेका उपविदेशमन्त्री आन्द्रेई रुडेन्कोले गर्नेछन्।
नेपाल–रुस कूटनीतिक सम्बन्ध स्थापनाको ७०औँ वर्षका अवसरमा हुन लागेको बैठकमा दुई देशबीचको सम्बन्धको समीक्षा गर्दै व्यापार, लगानी, पर्यटन, शिक्षा, संस्कृति र प्राविधिक सहयोग विस्तारबारे छलफल हुनेछ। क्षेत्रीय तथा अन्तर्राष्ट्रिय विषय र बहुपक्षीय मञ्चमा सहकार्यका विषयसमेत बैठकको एजेन्डामा रहनेछन्।
यसअघि संयन्त्रको पहिलो बैठक सन् २००७ मा मस्को र दोस्रो बैठक सन् २०१८ मा काठमाडौंमा भएको थियो।
नेपाल भ्रमणमा रहेका रुडेन्कोले मंगलबार आयोजित ‘ओपन डाइलग’मा नेपालमा बाढीबाट भएको जनधनको क्षतिप्रति दुःख व्यक्त गर्दै आवश्यक सहयोग गर्न रुस तयार रहेको बताएका थिए। उनले जलवायु परिवर्तनका कारण नेपालले भोगिरहेको जोखिमबारे प्रधानमन्त्री वालेन्द्र शाहले संयुक्त राष्ट्रसंघमा उठाएको विषयको समेत प्रशंसा गरे।
रुडेन्कोले आगामी शैक्षिक वर्षमा नेपाली विद्यार्थीका लागि रुसले ५२ छात्रवृत्ति कोटा उपलब्ध गराउने जानकारी दिएका छन्। भ्रमणका क्रममा नेपाली नागरिक रुसी सेनामा भर्ती भएको, बेपत्ता तथा मृत्यु भएका नेपालीका परिवारलाई क्षतिपूर्ति लगायतका विषयमा पनि छलफल हुने अपेक्षा गरिएको छ।
