काठमाडौं, २० असोज। अर्थमन्त्री डा. स्वर्णिम वाग्ले र विश्व बैंक समूहका अध्यक्ष अजय बाङ्गाबीच अमेरिकाको वासिङ्टन डिसीमा उच्चस्तरीय भेटवार्ता भएको छ।
विश्व बैंक अध्यक्षको निमन्त्रणामा अमेरिका पुगेका अर्थमन्त्री वाग्लेले भेटमा रसुवाको भोटेकोशी बाढीबाट क्षतिग्रस्त पूर्वाधार पुनर्निर्माण, आर्थिक सुधार, बिमा तथा सामाजिक संरक्षणका लागि करिब १ अर्ब अमेरिकी डलर बराबरको स्रोत परिचालनबारे छलफल गरेका थिए।
भेटमा अध्यक्ष बाङ्गाले बाढीबाट भएको क्षतिप्रति दुःख व्यक्त गर्दै पुनर्निर्माणमा विश्व बैंकले महत्वपूर्ण सहयोग गर्ने प्रतिबद्धता जनाए। उनले नेपालमा नीतिगत तथा संस्थागत सुधारका प्रयासको प्रशंसा गर्दै पूर्वाधारमा लगानी बढाउन र स्वदेशमै रोजगारी सिर्जना गर्नुपर्नेमा जोड दिए।
विश्व बैंकले एसियाली विकास बैंक र अन्तर्राष्ट्रिय वित्त निगमलगायत विकास साझेदारसँग समन्वय गरी नेपालका प्राथमिकताका क्षेत्रमा संयुक्त लगानी विस्तार गर्ने जानकारीसमेत दिएको छ।
विश्व बैंकका अनुसार तीन दशकपछि विश्व बैंक अध्यक्ष र नेपालका अर्थमन्त्रीबीच भएको यो पहिलो प्रत्यक्ष द्विपक्षीय भेटवार्ता हो।
