काठमाडौं, १७ असोज । नेपाली कांग्रेसको केन्द्रीय निर्वाचन समितिले आसन्न १५औँ महाधिवेशन र त्यसपछि हुने कार्यसमिति निर्वाचनका विषयमा पार्टी विधानमा रहेको उम्मेदवारी सम्बन्धी व्यवस्था स्पष्ट पारेको छ।
समितिका सदस्य सचिव राजु कटुवालले जारी गरेको विज्ञप्तिमा कांग्रेसको विधान २०१७ (संशोधनसहित) अनुसार एउटै अधिवेशन अवधिमा कुनै तहमा उम्मेदवारी दिएको व्यक्ति सोही अवधिमा माथिल्लो वा तल्लो तहको कार्यसमितिमा उम्मेदवार बन्न नपाउने व्यवस्था रहेको उल्लेख छ।
यसअनुसार १५औँ महाधिवेशनमा कुनै पनि पदमा उम्मेदवारी दिने व्यक्ति त्यसपछि हुने प्रदेश वा जिल्ला कार्यसमितिको निर्वाचनमा उम्मेदवार बन्न नपाउने समितिले जनाएको छ।
त्यस्तै पदेन महाधिवेशन प्रतिनिधि तथा भ्रातृ संघ र शुभेच्छुक संस्थाबाट आएका पदेन प्रतिनिधिले महाधिवेशनमा केन्द्रीय कार्यसमितिका लागि उम्मेदवारी दिन नपाउने व्यवस्था पनि विज्ञप्तिमार्फत स्पष्ट गरिएको छ।
