काठमाडौं, १७ असोज । नेपाली कम्युनिस्ट पार्टी (नेकपा)का संयोजक पुष्पकमल दाहाल ‘प्रचण्ड’ले कम्युनिस्ट तथा लोकतान्त्रिक शक्तिबीच सदन र सडकसँगै निर्वाचनमा समेत सहकार्य गर्नुपर्ने बताएका छन्।
शनिबार कांग्रेस जिल्लाको एकता बैठकलाई सम्बोधन गर्दै प्रचण्डले विचार मिल्ने शक्तिबीच सहकार्य र कार्यगत एकतालाई अघि बढाउनुपर्ने बताएका हुन्। उनले आगामी दिनमा सदन र सडकको संघर्षमा सहकार्य गर्दै आवश्यकताअनुसार निर्वाचनमा समेत सहकार्यको आधार तयार गर्नुपर्नेमा जोड दिए।
प्रचण्डले विगतका कमजोरी सच्याउँदै पार्टी, विचार, संगठन र नेतृत्वलाई नयाँ परिस्थितिअनुसार रूपान्तरण गर्नुपर्ने बताए। कम्युनिस्ट शक्तिबीच एकता तथा संविधान र संघीय लोकतान्त्रिक गणतन्त्रका पक्षधर शक्तिबीच सहकार्य आवश्यक रहेको उनको भनाइ थियो।
उनले नेता तथा कार्यकर्तालाई जनताका दैनिक समस्यासँग जोडिन निर्देशन दिँदै महँगी, बेरोजगारी, भ्रष्टाचार, सुशासनको अभाव तथा गरिब, सुकुम्बासी र मजदुरका मुद्दालाई प्राथमिकताका साथ उठाउन आग्रह गरे।
