काठमाडौं, १७ भदौ। प्रतिनिधिसभाले भोटेकोशी र त्रिशूली नदीमा आएको बाढीबाट भएको जनधनको क्षतिप्रति दुःख व्यक्त गर्दै विशेष प्रस्ताव सर्वसम्मतिले पारित गरेको छ।
भदौ १० गतेको बाढीबाट रसुवा, नुवाकोट, धादिङ, चितवन र गोरखाका नदी तटीय क्षेत्रमा ठूलो क्षति भएको प्रस्तावमा उल्लेख छ।
बाढीमा ज्यान गुमाउनेप्रति श्रद्धाञ्जली तथा शोकाकुल परिवारप्रति समवेदना व्यक्त गर्दै संसद्ले घाइतेको उपचार र घरबारविहीन नागरिकको तत्काल व्यवस्थापन तथा पुनःस्थापनाका लागि सरकारको ध्यानाकर्षण गराएको छ।
