काठमाडौं, १६ भदौ । रसुवाको भोटेकोशीमा आएको भीषण बाढीपछि त्रिशूली र नारायणी नदीका तटीय क्षेत्रमा फेला परेका शवमध्ये हालसम्म २८० शवको फरेन्सिक परीक्षण र डीएनए नमूना सङ्कलन गरी देवघाटस्थित व्यवस्थापनस्थलमा सुरक्षित रूपमा व्यवस्थापन गरिएको छ।
जिल्ला प्रहरी कार्यालय चितवनका अनुसार त्रिशूली र नारायणी नदीबाट हालसम्म ३२१ शव सङ्कलन गरिएको छ। तीमध्ये १२ शवको पहिचान भएपछि आफन्तले बुझिसकेका छन्।
सङ्कलित शवमध्ये ६६ महिला, ११६ पुरुष, सात बालक, छ बालिका तथा १२६ जनाको पहिचान खुल्न सकेको छैन। भविष्यमा पहिचान गर्न सकिने गरी अन्तर्राष्ट्रिय मापदण्डअनुसार शवको डीएनए र अन्य आवश्यक जैविक नमूना सुरक्षित राखिएको प्रहरीले जनाएको छ।
नदी किनारमा शव खोज्ने कार्य अझै जारी रहेको र फेला परेका शवलाई भरतपुर अस्पतालमा परीक्षणपछि देवघाटमा व्यवस्थापन गरिँदै आएको छ।
