काठमाडौं, ११ भदौ। भोटेकोशी नदीको बाढीबाट क्षतिग्रस्त अपर त्रिशूली–३ ‘ए’ जलविद्युत् आयोजनामा रोकिएका कर्मचारीको उद्धारका लागि नेपाली सेनाको हेलिकप्टर आज आयोजनास्थलमा सफलतापूर्वक अवतरण गरेको छ। प्रतिकूल मौसमका कारण हिजोका दुई प्रयास असफल भएका थिए।
हेलिकप्टर अवतरणसँगै आयोजनाको अवस्था र बाढीबाट भएको क्षतिको स्थलगत निरीक्षण सुरु गरिएको छ। कर्मचारी उद्धार र विद्युत् सेवा पुनर्स्थापनाका लागि नेपाल विद्युत् प्राधिकरणको उच्चस्तरीय टोली पनि घटनास्थलमा खटिएको छ।
यसैबीच, बाढी प्रभावित नुवाकोटका विभिन्न क्षेत्रमा वैकल्पिक लाइनमार्फत विद्युत् आपूर्ति सुचारु गरिएको प्राधिकरणले जनाएको छ। अन्य क्षेत्रमा पनि वैकल्पिक प्राविधिक उपाय प्रयोग गरी विद्युत् सेवा छिटो पुनर्स्थापना गर्ने काम भइरहेको छ।
