काठमाडौं । सरकारले भोटेकोशी बाढीबाट घाइते भएकाहरूको निःशुल्क उपचार गर्ने निर्णय गरेको छ।
मन्त्रिपरिषद् बैठकका निर्णय सार्वजनिक गर्दै सरकारका प्रवक्ता तथा शिक्षामन्त्री सस्मित पोखरेलले घाइतेको उपचारको व्यवस्था स्वास्थ्य मन्त्रालय, नेपाली सेना र सरकारी अस्पतालमार्फत गरिने जानकारी दिए।
बाढीमा फसेका तथा घरबास गुमाएकाहरूलाई तत्काल उद्धार गरी सुरक्षित स्थानमा लैजान गृह मन्त्रालयलाई निर्देशन दिइएको छ। उद्धारका लागि नेपाली सेना र निजी क्षेत्रका हेलिकप्टरसहित आवश्यक सबै साधन प्रयोग गरिने सरकारले जनाएको छ।
त्यस्तै, घरबास गुमाएकाहरूको व्यवस्थापन गृह मन्त्रालय, राष्ट्रिय विपद् जोखिम न्यूनीकरण प्राधिकरण र सम्बन्धित निकायले गर्नेछन्। अवरुद्ध सडक तथा खानेपानी सञ्चालन, विद्युत् आपूर्ति पुनःस्थापना र मृतकका परिवारलाई कानुनअनुसार क्षतिपूर्ति उपलब्ध गराउने निर्णय पनि सरकारले गरेको छ।
