काठमाडौं, १० भदौ । तिब्बततर्फबाट रसुवा हुँदै आएको बाढीले त्रिशूली नदी आसपासका ३०० मेगावाटभन्दा बढी क्षमताका जलविद्युत् आयोजनामा ठूलो क्षति पुगेको ऊर्जा मन्त्रालयले प्रारम्भिक अनुमान गरेको छ।
बाढीबाट निर्माणाधीन तथा सञ्चालनमा रहेका आयोजनाका विद्युत्गृह र सबस्टेसनमा क्षति पुगेको बताइएको छ। रसुवागढी, चिलिमे, त्रिशूली–३ ए तथा बी, मैलुङ, त्रिशूली–बेनिघाट र साञ्जेनलगायत आयोजनामा क्षति भएको मन्त्रालयले जनाएको छ।
यद्यपि, क्षतिको यकिन विवरण अझै प्राप्त भएको छैन। बाढी निरन्तर आइरहेकाले क्षतिको विवरण तथा प्रभावित कर्मचारीको अवस्था बुझ्न कठिन भइरहेको अधिकारीहरूले बताएका छन्।
