काठमाडौं, ८ भदौँ । श्रम संस्कृति पार्टीका अध्यक्ष तथा सांसद हर्कराज राईले प्रधानमन्त्री बालेन्द्र साहको मुस्ताङ भ्रमणबारे संसदलाई स्पष्ट जानकारी गराउन सरकारसँग माग गरेका छन् ।
सोमबार प्रतिनिधिसभाको बैठकमा बोल्दै राईले प्रधानमन्त्रीजस्तो सार्वजनिक जिम्मेवारीमा रहेको व्यक्तिको भ्रमणलाई पूर्ण रूपमा निजी भन्न नमिल्ने तर्क गरे ।
प्रधानमन्त्रीसँग सुरक्षा संयन्त्रसमेत परिचालन हुने भएकाले भ्रमणको उद्देश्य र विवरणबारे संसदलाई जानकारी दिनुपर्ने उनको भनाइ थियो ।
राईले प्रधानमन्त्रीले मन्त्रिपरिषद् र संसदलाई जानकारी नदिई मुस्ताङ भ्रमण गर्नुको कारणबारे समेत प्रश्न उठाए । उनले भ्रमणको उद्देश्य स्पष्ट पार्दै सदनमा जवाफ दिन प्रधानमन्त्रीसँग माग गरे ।
उनले सार्वजनिक पदमा रहेका व्यक्तिले आफ्नो जिम्मेवारी र भूमिकाप्रति थप संवेदनशील हुनुपर्ने बताए । साथै, मुलुकमा कानुनप्रतिको सम्मान र डर कायम हुने वातावरण बनाउन नसके अराजकता बढ्न सक्ने चेतावनी दिए ।
