जनकपुर, ६ भदौ । जनकपुरधाममा पहिलो चरणअन्तर्गत शनिबार सातवटा सार्वजनिक पोखरी अतिक्रमणमुक्त गरिएको छ।
गिरनारी (गोरधोइ), दिर्घीका सर, मुरली सर, रत्नसागर, अर्गजा सर, दशरथ तलाउ र विसहरा तलाउमा डोजर चलाएर अतिक्रमण हटाइएको हो।
गुठी जग्गा संरक्षण तथा अतिक्रमण हटाउने कार्यान्वयन समितिका सदस्य-सचिव जनक पोखरेलका अनुसार अभियानका क्रममा अतिक्रमण गरी बनाइएका ६५ वटा घरटहरा हटाइएका छन्। यसअघि साउन १ गते अतिक्रमित क्षेत्र खाली गर्न सूचना जारी गरिएको थियो ।
समितिले पहिलो चरणमा पहिचान भएका ५० वटा पोखरी अतिक्रमणमुक्त गर्ने लक्ष्य लिएको छ। अब अन्य पोखरीको रेखांकन गरी योजनाबद्ध रूपमा अतिक्रमण हटाइनेछ।
अभियानका लागि २०६२ सालमा भोजराज घिमिरे नेतृत्वको कार्यदलले तयार पारेको प्रतिवेदनलाई आधार बनाइएको छ।
