काठमाडौँ, ५ भदौ । नेपाली कांग्रेसको संस्थापन इतर समूहले पार्टीको १५औँ महाधिवेशन प्रक्रिया रोक्न माग गर्दै शुक्रबार सर्वोच्च अदालतमा रिट दायर गर्ने भएको छ ।
महाराजगञ्जमा तीन दिन बसेको शीर्ष नेताहरूको बैठकले पार्टीको आधिकारिकतासम्बन्धी विवादमा सर्वोच्चले पुनरावलोकनको अनुमति दिएकाले त्यसको टुंगो नलागेसम्म महाधिवेशनका गतिविधि रोक्न माग गर्ने निर्णय गरेको हो ।
इतर समूहका अनुसार निवर्तमान सभापति शेरबहादुर देउवा र कार्यवाहक सभापति पूर्णबहादुर खड्काले छुट्टाछुट्टै रिट दायर गर्नेछन् । विशेष महाधिवेशनबाट चयन भएको समितिले विवाद टुंगो नलागेसम्म महाधिवेशन अघि बढाउन नमिल्ने भन्दै अन्तरिम आदेश माग गरिनेछ ।
कांग्रेस निर्वाचन समितिले भने १५औँ महाधिवेशनको वडा अधिवेशन भदौ २४ गतेदेखि सुरु गर्ने र असोज १६ देखि १९ गतेसम्म काठमाडौंमा महाधिवेशन गर्ने कार्यतालिका सार्वजनिक गरिसकेको छ ।
