जनकपुर, ५ भदौ । जनकपुरस्थित प्रसिद्ध भूतनाथ मन्दिर -स्वर्गद्वारी) मा मध्यराति चोरी भएको छ ।
राति करिब १:३० बजे मन्दिरमा प्रवेश गरी चाँदीको जलढरी, नाग, चार देवताको चाँदीका मुकुटलगायत गरगहना चोरी गर्दै गरेका दुई जनामध्ये एक जनालाई प्रहरीले रङ्गेहात पक्राउ गरेको छ ।
मन्दिरबाट आएको आवाज सुनेपछि नजिकै घरको छतमा सुतिरहेका युवाहरूले घटना देखेर प्रहरीलाई खबर गरेका थिए । मन्दिरबाट करिब १५० मिटर दूरीमा रहेको प्रहरीले सूचना पाएको करिब दुई मिनेटमै घटनास्थल पुगेर एक जनालाई पक्राउ गरेको हो ।
अर्का व्यक्ति भने फरार भएका छन् । मन्दिरका समाजसेवी पवन सिँघानियाँले आफूलाई राति करिब २ बजे घटनाबारे जानकारी भएको बताए ।
पक्राउ परेका व्यक्तिको पहिचान र चोरी भएको सामानबारे प्रहरीले थप अनुसन्धान गरिरहेको जनाएको छ ।
