बारा, ४ भदौ । जीतपुरसिमरा उपमहानगरपालिका १ की तीन वर्षीया गरिमा चौधरीको बलात्कारपछि हत्या भएको घटनाको विरोधमा स्थानीयवासीले प्रदर्शन गरेका छन् ।
बालिकाको हत्यामा संलग्न दोषीलाई तत्काल पक्राउ गरी कडा कानुनी कारबाही गर्न माग गर्दै प्रदर्शनकारीहरूले बिहीबार इलाका प्रहरी कार्यालय सिमरा घेराउ गरेका हुन् ।
प्रदर्शनकारीहरूले घटनाको निष्पक्ष र प्रभावकारी अनुसन्धान गरी दोषीलाई कुनै पनि हालतमा उन्मुक्ति दिन नहुने बताएका छन् । उनीहरूले पीडित परिवारलाई न्यायको सुनिश्चितता गर्न समेत प्रहरी प्रशासनसँग माग गरेका छन् ।
बालिकाको मृत्युको घटनापछि स्थानीयस्तरमा आक्रोश बढ्दै गएको छ । प्रदर्शनकारीहरूले दोषी पक्राउ गरी कडा कारबाही नभएसम्म आन्दोलन जारी राख्ने चेतावनी दिएका छन् ।
