काठमाडौँ, ४ भदौ । राष्ट्रिय स्वतन्त्र पार्टी (रास्वपा)का सांसद खगेन्द्र सुनारले प्रहरी हेडक्वार्टरमा बिचौलियाको प्रभाव रहेको आरोप लगाएका छन्। प्रतिनिधिसभाको सार्वजनिक लेखा समितिको बैठकमा बोल्दै उनले प्रहरीका स्रोतसाधन खरिदमा बिचौलियाको चलखेल भएको दाबी गरेका हुन्।
सुनारले यसअघि समितिले १५ दिनभित्र प्रहरी स्रोतसाधन खरिदसम्बन्धी विवरण उपलब्ध गराउन भने पनि जानकारी नआएको भन्दै प्रश्न गरे। उनले त्यसबीच प्रहरीले करोडौँ रुपैयाँका टेन्डर आह्वान गरेकोप्रति समेत आपत्ति जनाए।
उनले अघिल्लो बैठकमा आफूले उठाएका प्रश्नमा अझै दृढ रहेको बताउँदै कसैको मानमर्दन भएको भए अदालत जान चुनौती दिए। साथै, सार्वभौम संसदीय समितिमा आएर मर्यादाविपरीत जुहारी खेल्न नहुने उनको भनाइ थियो।
सुनारको अघिल्लो बैठकको अभिव्यक्ति र शैलीको आलोचना भएपछि सभामुखले समेत चासो लिँदै समितिका सभापति, सचिव र प्रहरी महानिरीक्षकसँग छलफल गरेका थिए। रास्वपाले पनि आफ्ना सांसदलाई प्रस्तुतीमा मर्यादा कायम गर्न निर्देशन दिएको थियो।
