काठमाडौँ, ४ भदौ । सङ्घीय संसद् मातहतका नौ वटा संसदीय समितिको बैठक आज बस्दैछ ।
प्रतिनिधिसभाको बैठक भदौ ८ र राष्ट्रियसभाको बैठक शुक्रबार तय भएकाले आज धेरै समितिका बैठक एकै दिन बस्न लागेका हुन् । अर्थ समितिमा नेपाल राष्ट्र बैंक ऐन संशोधन विधेयकमाथि दफावार छलफल हुनेछ भने अन्तर्राष्ट्रिय सम्बन्ध तथा पर्यटन समितिमा पर्यटन विधेयकबारे होटल एसोसिएसन नेपाललगायत सरोकारवालासँग छलफल गरिनेछ ।
त्यस्तै, उद्योग तथा वाणिज्य समितिमा उजुरी, कृषि तथा प्राकृतिक स्रोत समितिमा जैविक मलको उत्पादन तथा रासायनिक मलको प्रयोग घटाउने विषय र पूर्वाधार विकास समितिमा बागमती ब्युटिफिकेसन आयोजनाबारे छलफल हुनेछ ।
राज्य व्यवस्था समितिले अख्तियार दुरुपयोग अनुसन्धान आयोगको कामकारबाहीबारे छलफल गर्नेछ । शिक्षा, स्वास्थ्य तथा सूचना प्रविधि समितिमा राष्ट्रिय विधि विज्ञान प्रयोगशाला विधेयक, सार्वजनिक लेखा समितिमा वैदेशिक सहायता लेखापरीक्षण र विधायन व्यवस्थापन समितिमा विधायिकी अन्तरसम्बन्धबारे छलफल हुने कार्यसूची छ ।
