काठमाडौं, २ भदौ । सुनसरीको देवानगञ्ज गाउँपालिका–३, कप्तानगञ्जमा भएको साम्प्रदायिक तनाव, झडप र गोलीकाण्डबारे तयार स्थलगत अध्ययन प्रतिवेदनले सरकारलाई धार्मिक विद्यालयको नियमन, सीमा सुरक्षा मजबुत बनाउन तथा घटनाको निष्पक्ष छानबिन गर्न सुझाव दिएको छ ।
गृहमन्त्री सुधन गुरुङको मौखिक निर्देशनपछि साउन १२ गते गृह मन्त्रालयका स्वकीय सचिव जेम्स कार्की र सुनसरी–४ का सांसद ई. दीपककुमार साहको टोलीले घटनास्थल पुगेर अध्ययन गरेको थियो ।
प्रतिवेदन प्रधानमन्त्री वालेन्द्र -बालेन) शाह र गृहमन्त्री गुरुङलाई प्रारम्भिक अध्ययनका लागि पठाइएको छ । प्रतिवेदनअनुसार साउन १० गते साँझ बोलबम यात्राका क्रममा हिन्दु युवाले डिजे बजाउँदा मुस्लिम युवासँग विवाद भएको थियो ।
विवाद बढ्दै गएपछि डिजे तोडफोड र झडप भएको तथा राति प्रहरीले हवाई फायर गरेपछि बत्ती निभेको अवस्थामा गोली चल्दा करिब १० जना हिन्दु युवा घाइते भएको उल्लेख छ ।
नेपाल प्रहरी र सशस्त्र प्रहरी दुवैतर्फबाट गोली चलेको प्रारम्भिक विवरणमा जनाइएको छ । प्रहरीको भूमिकामाथि उठेका प्रश्नबारे मोबाइल कल डिटेल, लोकेसन, सम्बन्धित व्यक्तिको बयान र डिजिटल प्रमाणबाट छानबिन गर्न प्रतिवेदनले सुझाव दिएको छ ।
साथै सीमावर्ती क्षेत्रमा रहेका मदरसा तथा अन्य धार्मिक विद्यालयको दर्ता, पाठ्यक्रम, शिक्षकको योग्यता, आर्थिक स्रोत र नियमित अनुगमनका लागि स्पष्ट कानुनी व्यवस्था गर्नुपर्ने निष्कर्ष निकालिएको छ ।
प्रतिवेदनले नेपाल–भारत खुला सीमाबाट हुने सम्भावित तस्करी तथा बाह्य तत्वको घुसपैठबारे सूक्ष्म अनुसन्धान गर्न र तत्काल …एकीकृत नागरिक शिक्षा तथा सामाजिक सद्भाव कार्यक्रमÚ सञ्चालन गर्न पनि सुझाव दिएको छ ।
यसैगरी, घटनाअघि संवेदनशील स्थानबारे सुरक्षा निकायका अधिकारीलाई पूर्वसूचना दिइएको भनिए पनि त्यसअनुसार सुरक्षा योजना, जनशक्ति परिचालन र लिखित निर्देशन भए–नभएको समेत छानबिन गर्नुपर्ने प्रतिवेदनमा उल्लेख छ ।
