कैलाली, २ भदौ । सुदूरपश्चिम प्रदेशका मुख्यमन्त्री खगराज भट्टले भोलि प्रदेशसभाबाट विश्वासको मत लिने तयारी गरेका छन् ।
मुख्यमन्त्री निवासमा भएको छलफलपछि भोलि नै विश्वासको मत लिने गरी प्रक्रिया अघि बढाइएको हो । विश्वासको मतका विषयमा छलफल गर्न आज दिउँसो २ बजे नेकपा संसदीय दलको बैठक बस्ने तयारी गरिएको छ ।
मुख्यमन्त्रीसँग छलफलमा रहेका एक सांसदका अनुसार संसदीय दलको बैठकमार्फत विश्वासको मत लिने विषयमा आवश्यक निर्णय गरिनेछ ।
शुक्रबार मुख्यमन्त्रीमा नियुक्त भएका भट्टले विश्वासको मत प्राप्त गरेपछि प्रदेश सरकारलाई पूर्णता दिने तयारी गरेका छन् । हाल नेकपा एमालेबाट तीन मन्त्री र एक राज्यमन्त्री नियुक्त भइसकेका छन् ।
अब नेकपाका तर्फबाट थप तीन मन्त्री र दुई राज्यमन्त्री नियुक्त गर्ने तयारी भइरहेको छ। मन्त्रिपरिषद् विस्तारका विषयमा नेकपा संसदीय दलका नेता तथा मुख्यमन्त्री भट्ट र प्रदेश इन्चार्ज भानुभक्त जोशीबीच संयुक्त छलफल भएको थियो ।
यसअघि प्रदेश संयोजक हरि चौधरी, नेतृ रञ्जिता श्रेष्ठ, इन्चार्ज जोशी र मुख्यमन्त्री भट्टबीच पनि विश्वासको मतका विषयमा छलफल भएको थियो ।
