काठमाडौं, ३१ साउन । पूर्वराष्ट्रपति विद्यादेवी भण्डारीले युवालाई तथ्य, तर्क, अध्ययन र बहसका आधारमा राजनीतिक धारणा निर्माण गर्न आग्रह गरेकी छन् ।
मदन भण्डारी आइडोलोजी स्टुडेन्ट फोरमले आयोजना गरेको कार्यक्रममा बोल्दै उनले सामाजिक सञ्जाल र सूचना प्रविधिका कारण सूचना धेरै भए पनि सही ज्ञानका लागि अध्ययन र संवाद आवश्यक रहेको बताइन् ।
भण्डारीले लोकतन्त्रको वास्तविक शक्ति फरक विचारलाई सम्मानपूर्वक सुन्ने र तथ्य तथा तर्कका आधारमा आफ्नो दृष्टिकोण बनाउने संस्कारमा रहेको उल्लेख गरिन् ।
युवाको राजनीतिक सहभागिता निर्वाचनमा मात्र सीमित नभई नीति निर्माण, जनताको आवाज र देशको विकासमा निरन्तर योगदान गर्ने प्रक्रियाका रूपमा अघि बढ्नुपर्ने उनको भनाइ थियो ।
