काठमाडौं, २८ साउन । पत्रकार किशोर श्रेष्ठलाई अनुसन्धानका लागि जिल्ला अदालत काठमाडौंले थप तीन दिन हिरासतमा राख्न अनुमति दिएको छ ।
न्यायाधीश उमेशप्रसाद लुइँटेलको इजलासले म्याद थपको अनुमति दिएको हो । वैयक्तिक गोपनीयता हननसम्बन्धी कसुरमा प्रहरीले बुधबार राति ललितपुरस्थित निवासबाट श्रेष्ठलाई पक्राउ गरेको थियो ।
उनी जनआस्था साप्ताहिक तथा जनआस्था डटकमका सञ्चालक एवं सम्पादक हुन् । श्रेष्ठको रिहाइको माग गर्दै नेपाल बारका पदाधिकारी तथा वरिष्ठ कानुन व्यवसायीले बहस गरेका थिए ।
पत्रकारसम्बन्धी संघसंस्थाले समेत उनको रिहाइको माग गर्दै प्रदर्शन गरिरहेका छन्। श्रेष्ठलाई हाल जिल्ला प्रहरी परिसर काठमाडौंको हिरासतमा राखिएको छ ।
