एजेन्सी । थाइल्यान्डको राजधानी बैंककमा १४ वर्षीय किशोरले गोली चलाउँदा ८ जनाको मृत्यु भएको छ भने २२ जना घाइते भएका छन् ।
किशोरले सुरुमा आफ्ना ७३ वर्षीय हजुरबुबा र ७४ वर्षीया हजुरआमाको हत्या गरी बन्दुक लिएर देब्सिरिन विद्यालय पुगेका थिए । विद्यालयमा गोली चलाउँदा पाँच शिक्षक र एक विद्यार्थीको मृत्यु भएको बताइएको छ ।
पछि किशोरले आफैंलाई गोली हानेका थिए । प्रहरीका अनुसार आक्रमणमा प्रयोग भएको बन्दुक किशोरका हजुरबुबाको कानुनी रूपमा दर्ता भएको हतियार थियो ।
प्रारम्भिक अनुसन्धानमा घटना पूर्वतयारीसहित भएको देखिएको प्रहरीले जनाएको छ । घटनापछि थाइल्यान्डका प्रधानमन्त्री अनुतिन चार्नविराकुलले सार्वजनिक स्थानमा बन्दुक बोक्न थप कडाइ गर्ने गरी नयाँ कानुन ल्याउने घोषणा गरेका छन् ।
थाइल्यान्डमा नागरिकको हातमा रहेका बन्दुकको नियमन र कानुन कार्यान्वयनबारे घटनापछि पुनः बहस सुरु भएको छ ।
