बिहार, १८ साउन । चुनावी रणनीतिकारका रूपमा परिचित प्रशान्त किशोरले पहिलो पटक उम्मेदवार बनेर ऐतिहासिक सफलता हासिल गरेका छन् ।
पटनाको बाँकीपुर विधानसभा उपनिर्वाचनमा उनले भारतीय जनता पार्टी -भाजपा) को करिब ३० वर्ष लामो वर्चस्व तोड्दै जन सुराज पार्टीलाई महत्वपूर्ण जित दिलाएका हुन् । भाजपा नेता नितिन नबिन राज्यसभामा निर्वाचित भएपछि रिक्त भएको सिटमा किशोर विजयी भएका हुन् ।
जितपछि उनले बाँकीपुरमा तीन महिनाभित्र देखिने गरी विकास गर्ने प्रतिबद्धता व्यक्त गर्दै बिहारभरिका जनताका लागि आफ्नो ढोका खुला रहने बताए ।
यो निर्वाचनमा युवा मतदाताको परिवर्तन चाहना निर्णायक बनेको विश्लेषण गरिएको छ । बिहारका मुख्यमन्त्री सम्राट चौधरीले किशोरलाई बधाई दिएका छन् भने जन सुराज पार्टीले यस जितलाई बिहारको वैकल्पिक राजनीतिका लागि ऐतिहासिक उपलब्धि र आगामी प्रदेश निर्वाचनअघि ठूलो मनोबलका रूपमा लिएको छ ।
