जनकपुर, ४ साउन । मधेश प्रदेश सरकारले ‘बेटी पढाऊ, बेटी बचाऊ’ कार्यक्रमअन्तर्गत खरिद गरेका ४५ सयभन्दा बढी साइकल वर्षौंदेखि गोदाममै थन्किएर कवाड बन्दै जाँदा पनि सम्बन्धित निकाय भने यस विषयमा स्पष्ट जानकारी दिन नसक्ने अवस्थामा देखिएका छन् ।
यस विषयमा केपी खबरले विगतमा पटक-पटक समाचार र रिपोर्ट प्रकाशन तथा प्रसारण गरे पनि सरकारको ध्यान जान सकेको छैन । पुनः यस विषयमा जानकारी लिन खोज्दा सरकारी निकायहरूबीच नै समन्वयको अभाव र जिम्मेवारी पन्छाउने प्रवृत्ति देखिएको छ ।
मुख्यमन्त्री तथा मन्त्रिपरिषद्को कार्यालयका सूचना अधिकारी रोहित कुमार कोइरालाले साइकलसम्बन्धी सम्पूर्ण कागजात शिक्षा तथा संस्कृति मन्त्रालयमा हस्तान्तरण गरिसकिएको बताएका छन् ।
तर शिक्षा तथा संस्कृति मन्त्रालयका सूचना अधिकारी प्रदीप कुमार साहले भने यस विषयमा आफूलाई कुनै जानकारी नभएको प्रतिक्रिया दिए । उनले यसबारे आवश्यक जानकारी संकलन गर्ने र बुझ्ने प्रयास गर्ने बताए ।
यस्तै शिक्षा तथा संस्कृति मन्त्री मनोज कुमार सिंहले पनि आफूलाई हालसम्म यस विषयमा विस्तृत जानकारी नरहेको स्वीकार गर्दै वास्तविक अवस्था बुझ्ने प्रयास भइरहेको बताए ।
सरकारका दुई जिम्मेवार निकाय र सम्बन्धित मन्त्री नै हजारौँ साइकल गोदाममा थन्किएर कवाड बन्दै गएको विषयमा अनभिज्ञ देखिनुले कार्यक्रमको प्रभावकारी कार्यान्वयन, अभिलेख व्यवस्थापन तथा सरकारी जवाफदेहितामाथि गम्भीर प्रश्न उठाएको छ ।
सार्वजनिक सम्पत्तिको संरक्षण र सदुपयोग गर्नुपर्ने दायित्व भएका निकायहरू नै यति ठूलो परिमाणमा गोदाममा थन्किएका साइकलबारे स्पष्ट जानकारी दिन नसक्नुले कार्यक्रमको वास्तविक अवस्था छानबिन गरी जिम्मेवार पक्षलाई जवाफदेही बनाउनुपर्ने आवश्यकता झन् बलियो बनेको छ ।
