काठमाडौं, २९ असार । प्रधानमन्त्री वालेन्द्र शाहले सातै प्रदेशमा आधुनिक सुविधा सम्पन्न बर्न उपचार केन्द्र स्थापना गर्ने योजना तत्काल कार्यान्वयनमा लैजान निर्देशन दिएका छन् ।
प्रधानमन्त्री तथा मन्त्रिपरिषद्को कार्यालयमा सोमबार स्वास्थ्य विज्ञान प्रतिष्ठानका उपकुलपतिहरूसँग भएको छलफलमा उनले प्रमुख सरकारी अस्पतालका बर्न वार्डलाई सुदृढ बनाउन र गम्भीर जलनका बिरामीले समयमै गुणस्तरीय उपचार पाउने व्यवस्था सुनिश्चित गर्न संघ, प्रदेश र स्वास्थ्य संस्थाबीच प्रभावकारी समन्वय गर्न आग्रह गरे ।
प्रधानमन्त्री शाहले नागरिकमैत्री स्वास्थ्य सेवा सरकारको प्राथमिकतामा रहेको उल्लेख गर्दै अस्पतालको सरसफाइ, सेवा प्रवाहमा सुधार, डिजिटल प्रविधिको विस्तार र सुशासनको प्रभावकारी कार्यान्वयनमा विशेष ध्यान दिन निर्देशन दिए ।
साथै आर्थिक रूपमा कमजोर नागरिकको उपचार पहुँच बढाउन निजी अस्पतालले कम्तीमा १० प्रतिशत ओपिडी सेवा सहुलियतमा उपलब्ध गराउने व्यवस्थालाई प्रभावकारी रूपमा लागू गर्न पनि जोड दिए ।
छलफलमा उपकुलपतिहरूले चिकित्सा शिक्षाको गुणस्तर, विशेषज्ञ सेवा विस्तार, डिजिटल स्वास्थ्य प्रणाली, पूर्वाधार विकास, अनुसन्धान प्रवद्र्धन तथा प्रतिष्ठानको जग्गा अतिक्रमणलगायत विषयमा सुझाव दिएका थिए ।
प्रधानमन्त्रीले अतिक्रमणको समस्या सम्बन्धित निकायसँग समन्वय गरी कानुनी प्रक्रियाअनुसार समाधान गरिने प्रतिबद्धता व्यक्त गरे ।
