काठमाडौं, २२ असार । पूर्वाधारमन्त्री सुनील लम्सालले जनताको काममा लापरबाही गर्ने जनप्रतिनिधि र पदाधिकारीमाथि कानुनअनुसार कारबाही गरिने बताएका छन्।
तनहुँको शुक्लागण्डकी नगरपालिकामा आयोजित कार्यक्रममा उनले स्थानीय तहका प्रमुखदेखि प्रदेश तहका जिम्मेवार पदाधिकारीसम्म जनताप्रति उत्तरदायी हुनुपर्ने उल्लेख गर्दै सेवा प्रवाहमा बेवास्ता गर्नेबारे सूचना दिन आग्रह गरे।
उनले जनताको काम नगर्नेहरूलाई कारबाही गरिने चेतावनी दिएका थिए, जसको भिडियो सामाजिक सञ्जालमा व्यापक रूपमा फैलिएको छ।
लम्साल यसअघि पनि काम नगर्ने ठेकेदारको “खुट्टा भाँच्ने” अभिव्यक्तिका कारण विवादमा परेका थिए। यसपटकको अभिव्यक्तिपछि पनि सामाजिक सञ्जालमा व्यापक चर्चा सुरु भएको छ।
