काठमाडौं, १७ असार। भारतको किशनगञ्ज जिल्लामा भारतीय सुरक्षा निकायले ६२३ ग्राम ब्राउन सुगर, ठूलो परिमाणमा नेपाली र भारतीय रुपैयाँसहित तीन जना लागूऔषध कारोबारीलाई पक्राउ गरेको छ।
गलगलिया क्षेत्रमा गरिएको कारबाहीमा ५४३ ग्राम ब्राउन सुगरसहित बुबा–छोरा मोहम्मद फारुख र मोहम्मद उमर पक्राउ परेका छन्। उनीहरूबाट मोबाइल फोन तथा नगद रकम पनि बरामद भएको प्रहरीले जनाएको छ।
यस्तै, दिघलबैंक क्षेत्रमा शाहनवाज हुसेनलाई ८० ग्राम ब्राउन सुगर, करिब २३ लाख ४८ हजार नेपाली रुपैयाँ, ३० हजार ५५० भारतीय रुपैयाँ, ६ वटा मोबाइल र डिजिटल तराजुसहित पक्राउ गरिएको छ।
प्रहरीका अनुसार बरामद नगद र लागूऔषधका आधारमा यो नेपालसँग जोडिएको अन्तर्राष्ट्रिय तस्करी सञ्जालसँग सम्बन्धित हुन सक्ने आशंका गरिएको छ। घटनाबारे थप अनुसन्धान जारी रहेको भारतीय सुरक्षा निकायले जनाएको छ।
