काठमाडौं, २८ भदौ । भदौ १० गते रसुवामा आएको बाढीले ६९ किलोमिटर सडकमा क्षति पुर्याएको छ।
राष्ट्रिय विपद् जोखिम न्यूनीकरण तथा व्यवस्थापन प्राधिकरण र राष्ट्रिय योजना आयोगको संयुक्त क्षति तथा आवश्यकता आकलन प्रतिवेदनअनुसार १४ किलोमिटर सडक आंशिक र ५५ किलोमिटर पूर्ण रूपमा बगेको हो।
गल्छी–त्रिशूली–रसुवागढी करिडोरअन्तर्गत वेत्रावती–रसुवागढीको ५५ किलोमिटर सडक पूर्ण रूपमा क्षतिग्रस्त भएको छ। बाढीबाट सडक पूर्वाधारमा २३ अर्ब ४२ करोड रुपैयाँभन्दा बढी क्षति भएको अनुमान छ।
सडक पुनर्स्थापनाका लागि करिब ५५ अर्ब १८ करोड रुपैयाँ आवश्यक पर्ने प्रतिवेदनमा उल्लेख छ। तत्काल भग्नावशेष हटाउने, ट्र्याक खोल्ने, अस्थायी डाइभर्सन र आपत्कालीन संरक्षणका काम गर्नुपर्ने तथा दीर्घकालमा स्थायी पुनर्निर्माण र भू–संरक्षण गर्नुपर्ने सुझाव दिइएको छ।
