काठमाडौं, १७ असार । अफगानिस्तान र पाकिस्तानबीचको सीमा क्षेत्रमा पुनः तनाव चुलिएको छ। तालिबान नेतृत्वको अफगान सरकारले पाकिस्तान सीमावर्ती क्षेत्रमा प्रतिआक्रमण गरेको दाबी गरेको छ भने पाकिस्तानले चारवटा गैरसैन्य ड्रोन खसालेको जनाएको छ।
तालिबान प्रशासनका अनुसार पाकिस्तानको दक्षिण–पश्चिमी बलुचिस्तान क्षेत्रमा गरिएको आक्रमणबाट धेरै व्यक्ति घाइते भएका छन्। यता, पाकिस्तानी सेनाले अफगानिस्तानतर्फबाट आएका चारवटा नन–सैन्य ड्रोन खसालिएको दाबी गर्दै थप उक्साहट भए कडा जवाफ दिने चेतावनी दिएको छ।
बीबीसीका अनुसार दुवै पक्षले गरेका दाबीहरू स्वतन्त्र रूपमा पुष्टि हुन सकेका छैनन्। पछिल्लो तनाव पाकिस्तानले आइतबार अफगानिस्तानभित्र गरेको हवाई आक्रमणपछि बढेको हो।
संयुक्त राष्ट्रसंघले उक्त हवाई आक्रमणमा २८ जना सर्वसाधारणको मृत्यु भएको जनाएको छ। तर, तालिबान सरकारले पाकिस्तानले आवासीय क्षेत्रलाई लक्षित गरी आक्रमण गर्दा ३६ सर्वसाधारणको ज्यान गएको र १६० भन्दा बढी व्यक्ति घाइते भएको दाबी गरेको छ।
गत अक्टोबरमा भएको युद्धविरामपछि केही समय शान्त रहेको अफगानिस्तान–पाकिस्तान सीमा क्षेत्रमा फेरि द्वन्द्वको अवस्था सिर्जना भएको छ।
पाकिस्तानले अफगानिस्तानले आफ्नो भूमिमा पाकिस्तानविरुद्ध सक्रिय आतंकवादी समूहलाई आश्रय दिएको आरोप दोहोर्याउँदै आएको छ। यद्यपि तालिबान सरकारले यस्तो आरोपलाई निरन्तर अस्वीकार गर्दै आएको छ।
