जनकपुर, १६ असार । महोत्तरीको गौशाला नगरपालिकाले मञ्जुरीबिना निगौल गाई गौशालाको जग्गामा ढल निकास गर्न खोजेपछि रोक्न गएकी कार्यालय प्रमुख कान्तिकुमारी पाण्डेमाथि नगर प्रहरीले कुटपिट तथा दुव्र्यवहार गरेको भिडियो सार्वजनिक भएको छ ।
गाई गौशालाले यो कार्य उच्च अदालत जनकपुरको अन्तरिम आदेशको उल्लंघन भएको दाबी गरेको छ । पाण्डेले नगर प्रमुखको निर्देशनमा नगर प्रहरीले आफूमाथि हातपात गरेको र यसअघि पनि गौशालाका कर्मचारी तथा सम्पत्तिमाथि हस्तक्षेप भएको आरोप लगाएकी छन्।
गाई गौशाला र नगरपालिकाबीच बजार ठेक्का तथा करिब ६ करोड रुपैयाँ बक्यौता विवाद लामो समयदेखि चल्दै आएको छ ।
यता गौशाला नगरपालिकाका प्रमुख प्रशासकीय अधिकृत ओमबहादुर अधिकारीले नगर प्रहरी र गाई गौशालाबीच विवाद भएको स्वीकार गरे पनि कुटपिटबारे आफूलाई जानकारी नभएको बताए ।
जिल्ला प्रहरी कार्यालय महोत्तरीले भने घटनाबारे जाहेरी आए कानुनअनुसार अनुसन्धान गरी आवश्यक कारबाही अघि बढाइने जनाएको छ ।
