एजेन्सी । भेनेजुएलामा बुधबार बिहान गएको शक्तिशाली भूकम्पमा परी मृत्यु हुनेको संख्या १६४ पुगेको छ ।
भूकम्पका कारण कम्तीमा ९ सय ७१ जना घाइते भएका छन् भने उद्धार तथा राहत कार्य जारी रहेको अधिकारीहरूले बताएका छन् । कार्यवाहक राष्ट्रपति डेल्सी रड्रिगेजका अनुसार भूकम्पबाट प्रभावित क्षेत्रमा ठूलो जनधनको क्षति भएको छ ।
बुधबार बिहान ७.२ र ७.५ रेक्टर स्केलका दुई शक्तिशाली भूकम्प गएको थियो । यसलाई भेनेजुएलाको पछिल्लो शताब्दीकै सबैभन्दा ठूलो भूकम्पका रूपमा हेरिएको छ ।
भूकम्पका कारण राजधानी काराकाससहित विभिन्न क्षेत्रमा अग्ला भवनहरू भत्किएका छन् । दर्जनौँ भवन पूर्ण रूपमा ध्वस्त भएका छन् भने धेरै संरचनामा क्षति पुगेको छ ।
भूकम्पको धक्का छिमेकी देशहरूमा समेत महसुस गरिएको थियो । काराकासको उत्तरतर्फ रहेको ला गुएइरा सहरमा उद्धारकर्मीहरूले भग्नावशेषबाट तीन जना बालबालिकालाई जीवितै उद्धार गरेका छन् ।
अन्य प्रभावित क्षेत्रमा पनि खोज तथा उद्धार कार्य तीव्र पारिएको छ । समाचार संस्था एपीका अनुसार कार्यवाहक राष्ट्रपति रड्रिगेजले प्रभावित क्षेत्रमा आपत्कालीन सहायता परिचालन गरिएको जानकारी दिएकी छन् ।
सरकारले घाइतेहरूको उपचार, बेपत्ता व्यक्तिको खोजी तथा विस्थापित नागरिकहरूको व्यवस्थापनलाई प्राथमिकता दिएको जनाएको छ । भूकम्पपछि प्रभावित क्षेत्रमा विद्युत्, सञ्चार तथा यातायात सेवा प्रभावित भएका छन् ।
अधिकारीहरूले क्षतिको यथार्थ विवरण संकलन भइरहेकाले मृतक र घाइतेको संख्या अझै बढ्न सक्ने बताएका छन् ।
