जनकपुर, १० असार । मधेश प्रदेशका खेलकुद तथा समाज कल्याण मन्त्री लखन दास तत्माले दलित समुदायको आर्थिक, सामाजिक तथा शैक्षिक सशक्तीकरणलाई अझ प्रभावकारी ढंगले अघि बढाउने प्रतिबद्धता व्यक्त गरेका छन् ।
उनले दलित समुदाय अझै पनि आर्थिक रूपमा सबैभन्दा कमजोर अवस्थामा रहेको उल्लेख गर्दै समुदायको समृद्धिको प्रमुख आधार शिक्षा भएको बताएका छन् ।
केपी खबरका पत्रकार प्रवेश साहले सञ्चालन गरेको केपी बहस अन्तर्वार्तामा मन्त्री तत्माले दलित समुदायका बालबालिका वर्तमान शिक्षा प्रणालीबाट सबैभन्दा बढी प्रभावित भइरहेको बताए ।
दुई प्रकारको शिक्षा प्रणालीले अवसरमा असमानता सिर्जना गरेको भन्दै उनले समान र गुणस्तरीय शिक्षाको पहुँच सुनिश्चित गर्न एकीकृत शिक्षा प्रणाली लागू गर्नुपर्नेमा जोड दिए । मन्त्री तत्माले दलित सशक्तीकरणलाई केवल नारामा सीमित नराखी व्यवहारमा उतार्न मन्त्रालयले विभिन्न कार्यक्रम सञ्चालन गरिने जानकारी दिए ।
उनका अनुसार अति विपन्न दलित तथा मुस्लिम समुदायका लागि आवास, स्वास्थ्य, खानेपानी र शौचालय निर्माणका विशेष कार्यक्रम अघि सारिएका छन् । मधेश प्रदेशका १० हजारभन्दा बढी दलित तथा मुस्लिम परिवारलाई लक्षित गरी आवास तथा आधारभूत पूर्वाधार निर्माण कार्यक्रम सञ्चालन गरिने उनले बताए ।
युवाहरूको सशक्तीकरणलाई दलित उत्थानसँग जोड्दै मन्त्री तत्माले सीपमूलक तालिम, व्यावसायिक दक्षता विकास तथा सहुलियतपूर्ण स्टार्टअप ऋण उपलब्ध गराएर युवालाई स्वरोजगारतर्फ आकर्षित गरिने जानकारी दिए ।
विशेषगरी दलित, महिला, पिछडिएका तथा आर्थिक रूपमा कमजोर समुदायलाई लक्षित गरी स्वरोजगारमूलक कार्यक्रम सञ्चालन गरिने उनको भनाइ छ ।
उनले बजेटमा दलित समुदायको शिक्षा, स्वास्थ्य, आवास तथा खेलकुद क्षेत्रमा पहुँच विस्तार गर्ने कार्यक्रम समावेश गरिएको उल्लेख गर्दै मन्त्री तत्माले दलित सशक्तीकरणलाई मधेश प्रदेश सरकारको प्रमुख प्राथमिकतामध्ये एक बनाइएको बताए ।
Coming soon -Kp Bahas- interview
