महोत्तरी, १० असार । महोत्तरी गाउँपालिका–६ मा पुरानो तमसुक -लेनदेन कागजात) को आधारमा लाखौं रुपैयाँ असुल्न खोजिएको आरोप सार्वजनिक भएपछि स्थानीय स्तरमा विवाद चर्किएको छ ।
पीडित पक्ष, स्थानीय बासिन्दा तथा अधिकारकर्मीहरूले कथित रूपमा फर्जी कागजात प्रयोग गरी आर्थिक लाभ लिन खोजिएको आरोप लगाएका छन् भने सम्बन्धित पक्षले कागजात वैधानिक रहेको दाबी गरेको छ ।
स्थानीय स्रोतका अनुसार जयनारायण यादव नामक वृद्धमाथि ७ लाख २५ हजार रुपैयाँ बराबरको लेनदेन दाबी गर्दै रकम माग गरिएको छ । तर यादव तथा स्थानीय बासिन्दाहरूले उनी आर्थिक रूपमा कमजोर परिवारका व्यक्ति भएको उल्लेख गर्दै उक्त रकम कहिल्यै नलिएको दाबी गरेका छन् ।
जिल्ला प्रशासन कार्यालय महोत्तरीमा परेको निवेदनमा पुरानो ऋणसम्बन्धी तमसुकलाई आधार बनाएर पछिल्लो समयमा ठूलो रकम दाबी गरिएको उल्लेख गरिएको छ । निवेदकले लेनदेनको वास्तविकता तथा कागजातको वैधतामाथि समेत प्रश्न उठाएका छन् ।
विवादित कागजातकै आधारमा अदालतमा मुद्दा दायर गरिएको र सम्बन्धित व्यक्तिलाई पर्याप्त जानकारी तथा प्रतिरक्षाको अवसर नदिई एकतर्फी फैसला गराइएको गुनासोसमेत उठेको छ ।
स्थानीयका अनुसार तारेख पर्चीसमेत सम्बन्धित व्यक्तिबाट लुकाइएको तथा प्रतिउत्तर दिने अवसरबाट वञ्चित गरिएको आरोप छ। यद्यपि यस विषयमा अदालत वा सम्बन्धित निकायबाट आधिकारिक पुष्टि हुन बाँकी छ । स्थानीय बासिन्दाका अनुसार फैसला भएको भन्दै जयनारायण यादवलाई रकम तिर्न निरन्तर दबाब दिइएको छ ।
रकम नतिरे घरघडेरी लिलाम गरी असुलउपर गरिने चेतावनीसमेत दिइएको आरोप लगाइएको छ । यस क्रममा वैदेशिक रोजगारीमा रहेका उनका छोरासम्म सम्पर्क गरी रकम तिर्न दबाब दिइएको बताइएको छ । घटनाप्रति मानवअधिकारकर्मी तथा सामाजिक अभियन्ताहरूले पनि चासो व्यक्त गरेका छन्। उनीहरूले सम्भावित कागजात दुरुपयोग तथा आर्थिक शोषणको आशंका व्यक्त गर्दै निष्पक्ष र स्वतन्त्र अनुसन्धानको माग गरेका छन्।
राम एकवाल साहकी पत्नी बिणा साहले फर्जी तमसुक वा झुटा प्रमाणका आधारमा आर्थिक लाभ लिन खोजिएको पुष्टि भए कानुनी कारबाही हुनुपर्ने बताएकी छन् । विवादको अर्को पक्ष महोत्तरी गाउँपालिका–६ बाट गरिएको कागजात प्रमाणीकरणसँग सम्बन्धित छ । स्थानीय बासिन्दाहरूले २०७२ सालको कागजातलाई २०८० सालमा प्रमाणित गरिएको विषयमा प्रश्न उठाएका छन्।
केहीले जातीय तथा नातावादी प्रभावका आधारमा सिफारिस र प्रमाणीकरण गरिएको आरोपसमेत लगाएका छन् । यस विषयमा वडा अध्यक्षसँग सम्पर्क गर्ने प्रयास सफल हुन सकेन । उनका छोरा श्याम साहले भने उपलब्ध कागजात र लेखतका आधारमा मात्र सिफारिस गरिएको प्रतिक्रिया दिएको स्रोतले जनाएको छ ।
स्थानीय सरोकारवालाहरूले तमसुकको वैधता, अदालतको फैसला प्रक्रिया, वडा कार्यालयको प्रमाणीकरण तथा आर्थिक दाबीसम्बन्धी सम्पूर्ण विषयको स्वतन्त्र र निष्पक्ष छानबिन हुनुपर्ने माग गरेका छन्।
घटनामा संलग्न भनिएका सबै पक्षको आधिकारिक धारणा सार्वजनिक हुन बाँकी रहेकाले आरोपहरूको सत्यता सम्बन्धित निकायको अनुसन्धान र न्यायिक प्रक्रियाबाट मात्र पुष्टि हुने देखिएको छ ।
