काठमाडौं, २९ जेठ । शिक्षा, विज्ञान तथा खेलकुद मन्त्रालयले अध्ययन भिसा सिफारिसका लागि पेस गरिएका नक्कली कागजात सम्बन्धी घटनाको छानबिन गर्न तीन सदस्यीय समिति गठन गरेको छ ।
सहसचिव चन्द्रकान्त भुसालको संयोजकत्वमा गठित समितिलाई मन्त्रालयका कर्मचारीको सम्भावित संलग्नता, कागजात प्रमाणीकरण प्रक्रिया तथा प्रक्रियागत कमजोरीबारे अनुसन्धान गरी सात दिनभित्र प्रतिवेदन बुझाउने जिम्मेवारी दिइएको छ ।
वाल्मिकी विद्यापीठको नाममा पेस गरिएका कागजात नक्कली भेटिएपछि मन्त्रालयले सम्बन्धित विदेशी नागरिकहरूको भिसा प्रक्रिया तत्काल अघि नबढाउन सम्बन्धित निकायलाई अनुरोध गरेको छ । मन्त्रालयले घटनालाई गम्भीर रूपमा लिँदै अनुसन्धानको निष्कर्षका आधारमा आवश्यक प्रशासनिक तथा कानुनी कारबाही गरिने जनाएको छ ।
