जनकपुर, २९ जेठ । आगामी आर्थिक वर्षको बजेटमा कमला पुल निर्माणका लागि रकम विनियोजन नगरिएको भन्दै स्थानीयवासीले मधेश प्रदेशसभा अगाडि टायर बालेर विरोध प्रदर्शन गरेका छन् ।
हुलाकी राजमार्गअन्तर्गत सिरहा र धनुषा जिल्लालाई जोड्ने नयाँ कमला पुल निर्माणका लागि बजेट नपरेको भन्दै आक्रोशित स्थानीय आन्दोलनमा उत्रिएका हुन् ।
प्रदर्शनकारीहरूले झुटा आश्वासन चाहिँदैन, मनोमानी चल्दैन, नयाँ कमला पुल निर्माण गर लगायतका नारा लगाएका थिए । उनीहरूले मुख्यमन्त्री, अर्थमन्त्री तथा भौतिक पूर्वाधार विकासमन्त्रीविरुद्ध समेत नाराबाजी गरेका छन् ।
यसअघि पनि संघर्ष समितिले संघीय बजेटमा पुल निर्माणका लागि रकम नछुट्याइएको भन्दै प्रदेशसभा अगाडि विरोध जनाएको थियो ।
