एजेन्सी, २७ जेठ । फिलिपिन्सको मिन्डानाओ क्षेत्रमा सोमबार गएको ७.८ म्याग्निच्युडको शक्तिशाली भूकम्पमा मृत्यु हुनेको संख्या ४५ पुगेको छ भने ४ सय ८७ जना घाइते भएका छन्।
१७ जना अझै बेपत्ता रहेको राष्ट्रिय विपद् जोखिम न्यूनीकरण तथा व्यवस्थापन परिषद् (एनडीआरआरएमसी) ले जनाएको छ । भूकम्पबाट ३३ हजारभन्दा बढी परिवार प्रभावित भएका छन्। अस्पताल, विद्यालय र पुलसहित २ सयभन्दा बढी भौतिक संरचनामा क्षति पुगेको छ ।
अधिकारीहरूका अनुसार प्रभावित क्षेत्रमा खोज तथा उद्धार कार्य जारी छ । सारङ्गनी र दक्षिण कोटाबातो प्रान्त सबैभन्दा बढी प्रभावित भएका छन् ।
स्थानीय समयअनुसार सोमबार बिहान ७ः३७ बजे गएको भूकम्पको केन्द्रबिन्दु सारङ्गनी प्रान्तको मासिम सहर नजिक समुद्री क्षेत्रमा ३३ किलोमिटर गहिराइमा रहेको थियो। मुख्य भूकम्पपछि १,७०० भन्दा बढी परकम्प रेकर्ड गरिएका छन् ।
