जनकपुरधाम, २२ जेठ । तत्मा बौद्धिक समाज, नेपालद्वारा आयोजना गरिएको मधेश प्रदेश स्तरीय प्रथम भेला को सम्पूर्ण तयारी पूरा भएको आयोजक समितिले जनाएको छ।
यही जेठ २३ र २४ गते जनकपुरधाममा हुने भेलालाई सफल बनाउन आवश्यक सबै व्यवस्थापन कार्य अन्तिम चरणमा पुगेको र कार्यक्रम सञ्चालनका लागि सम्पूर्ण तयारी सम्पन्न भएको जानकारी दिइएको हो।
आयोजकका अनुसार भेलामा मधेश प्रदेशका विभिन्न जिल्लाबाट समाजका अगुवा, बुद्धिजीवी, युवा, महिला तथा कर्मचारी प्रतिनिधिहरूको उल्लेख्य सहभागिता रहनेछ। भेलाले तत्मा समुदायको शैक्षिक, सामाजिक, आर्थिक तथा राजनीतिक सशक्तीकरणका विषयमा व्यापक छलफल गर्दै भावी कार्यदिशा तय गर्ने अपेक्षा गरिएको छ।
कार्यक्रममा विभिन्न विशिष्ट व्यक्तित्व, जनप्रतिनिधि, समाजसेवी तथा समुदायका अगुवाहरूको सहभागिता रहनेछ। भेलामा समुदायको एकता, अधिकार, अवसर र समावेशी विकासका विषयमा विशेष बहस तथा अन्तरक्रिया कार्यक्रमसमेत आयोजना गरिने आयोजकले जनाएको छ।
भेलाको सफल सञ्चालनका लागि प्रचार–प्रसार, अतिथि सत्कार, सुरक्षा, आवास तथा व्यवस्थापनलगायतका उपसमितिहरू सक्रिय रूपमा परिचालित भएको र सम्पूर्ण तयारी सम्पन्न भइसकेको आयोजकको दाबी छ।
आयोजकले मधेश प्रदेशभरिका तत्मा समुदायका सदस्य, शुभेच्छुक तथा सरोकारवालाहरूलाई कार्यक्रममा सहभागी भई भेलालाई सफल बनाउन आग्रह गरेको छ।
